नगर दर्शन (वृत्तसेवा):- राहाता शहरातील अल्पवयीन मुलीच्या विनयभंग प्रकरणामुळे परिसरात संतापाची लाट उसळली असताना पीडितेला न्याय मिळवून देण्यासाठी कठोर भूमिका घेतलेल्या भाजप प्रदेश उपाध्यक्ष तथा माजी खासदार डॉ. सुजय विखे पाटील यांनी दिलेला शब्द अखेर पूर्ण झाला आहे. प्रशासनाने संबंधित आरोपीच्या अनधिकृत बांधकामावर बुलडोझर चालवत कारवाई केली.
घटना घडल्यानंतर डॉ. सुजय विखे पाटील यांनी पीडित कुटुंबीयांची भेट घेत त्यांना न्याय मिळवून देण्याचे आश्वासन दिले होते. तसेच महिलांच्या सन्मानाशी खेळ करणाऱ्यांविरोधात कोणतीही दया दाखवली जाणार नाही, असा इशाराही त्यांनी दिला होता.
त्यानंतर पोलीस, महसूल व नगरपालिकेच्या प्रशासनाने संयुक्तपणे कारवाई करत आरोपीच्या घरावरील अनधिकृत बांधकाम जमीनदोस्त केले. या कारवाईमुळे राहाता शहरासह संपूर्ण तालुक्यात कायद्याचा धाक निर्माण झाला असून महिलांच्या सुरक्षिततेबाबत प्रशासन गंभीर असल्याचा ठोस संदेश गेला आहे.
गुन्हेगार कोणताही असो, त्याला कायद्यापुढे झुकावेच लागेल, ही भूमिका या कारवाईतून अधोरेखित झाली आहे. त्यामुळे नागरिकांमध्ये समाधानाचे वातावरण असून पीडित कुटुंबीयांनाही मोठा दिलासा मिळाला आहे.
याप्रसंगी डॉ. सुजय विखे पाटील म्हणाले, “पीडितेला न्याय मिळवून देणे आणि समाजात सुरक्षित वातावरण निर्माण करणे ही आपली जबाबदारी आहे. महिलांवर अत्याचार करणाऱ्यांना कोणतीही माफी नाही. कायद्याच्या चौकटीत राहून अशा प्रवृत्तींवर कठोर कारवाई व्हायलाच हवी.” दरम्यान, आरोपीच्या घरावरील बुलडोझर कारवाईचे नागरिकांकडून स्वागत करण्यात येत असून महिलांच्या सुरक्षेसाठी प्रशासनाने घेतलेल्या कठोर भूमिकेचे सर्व स्तरांतून कौतुक होत आहे.
