नगर दर्शन (वृत्तसेवा):- अहिल्यानगर जिल्ह्यातील ममदापूर गावात लोणी पोलीस स्टेशनच्या पथकाने धाडसी कारवाई करत तब्बल 8 लाख रुपये किंमतीचा गोमांस साठा जप्त केला आहे. गुप्त माहितीच्या आधारे राबविण्यात आलेल्या या कारवाईमुळे परिसरात खळबळ उडाली आहे.
मिळालेल्या माहितीनुसार, ममदापूर परिसरात काही जणांकडून बेकायदेशीररीत्या गोमांसाची वाहतूक केली जात असल्याची खबर पोलिसांना मिळाली होती. या माहितीची खातरजमा करून पोलिसांनी सापळा रचत छापा टाकला. कारवाईदरम्यान दोन चारचाकी वाहनांची तपासणी केली असता मोठ्या प्रमाणावर गोमांस साठा आढळून आला.पोलिसांनी अंदाजे 600 किलो गोमांस जप्त केले असून त्याची बाजार किंमत सुमारे 8 लाख रुपये असल्याचे सांगण्यात आले. यासोबतच वाहतुकीसाठी वापरलेली वाहनेही जप्त करण्यात आली आहेत. संबंधित आरोपीला घटनास्थळावरून ताब्यात घेण्यात आले असून त्याच्याविरुद्ध महाराष्ट्र प्राणी संरक्षण कायद्यानुसार गुन्हा दाखल करण्यात आला आहे.
या कारवाईमागे वरिष्ठ अधिकाऱ्यांचे मार्गदर्शन लाभले असून लोणी पोलीस स्टेशनचे अधिकारी व कर्मचारी यांनी ही मोहीम यशस्वी केली. पोलिसांकडून या प्रकरणाचा अधिक तपास सुरू असून या मागे आणखी कोणाचे जाळे आहे का, याचाही शोध घेतला जात आहे.दरम्यान, या घटनेमुळे परिसरात चर्चेला उधाण आले असून पोलिसांच्या तत्पर कारवाईचे नागरिकांकडून कौतुक होत आहे.
